Ukiualuit matuma siorna Nunatta Katersusaasivianit misissuinermi pisuttuarfimmi tungujortumi Seqinniarfiup Sermermiullu akornani nassaarineqartoq immikkuullarilluinnartoq nalunaarsorneqarpoq.
Nassaap kulturimit sorlermeersuunera pisoqaassusaalu qulakkeerniarlugu itsarnisarsiuunik misorneqaqqaartussaavoq – isikkua naapertorlugu oqaluttuarisinnaavara nassaarineqartoq tunit siusinnerit tupeqarfigisimasaattut qeqqamigut killulerfilittut isikkoqartoq, taamaalilluni piffissami ukiup 0 sioqunnerani atorneqarsimassalluni – allatut oqaatigalugu ukiut 2.500 missaannik pisoqaassuseqarsinnaavoq.
Oqariarta, itsarnisarsiuut siunissami misissuinerini paasineqartoq nassaaq ilumut Tunit tupeqarfigisimagaat – taava qutsiinnarmi taama ittumik nassaarneq nassaatsialaavoq. Nalinginnaasumik tuperqarfiit taamaattut immap killinganiittaraluarput – qularutiginngivipparalu kanani Sermermiut sineriaata killingani aamma taama ittumik nassaassaqassasoq - tasamanili nunami meterinit arlalinnik itissusilimmiissapput.
Tupeqarfiusimasoq maani naaneqarpianngitsumi inunillu allanit kingusinnerusukkut najugaqarfigineqarsimanngitsumi innarlerneqariannaalluni inissisimavoq – taamaakkaluartoq suunngippasikkaluaqaluni ujaraannarnik sakkoqarnerup nalaani tamaani inoqarsimaneranik takussutissatut suli napavoq.
Takusinnaasarput tassaavoq tupeqarfik qeqqamigut killulerfilik – ujaqqanik tamaanniittunik sananeqarsimasoq – nassuerutigissuaralu isinik sungiussisimanngitsunik pilersitaq taanna asseqanngitsoq sanalluagaaqisorlu takujuminaassinnaammat.
Killuni, killulerfiit qeqqaniittuni, ikumaartitsisoqartarsimavoq tupeqarfiullu sinaani ujaqqat toqqup qalianut amiusumut perorineqarsimapput. Tupiunera ilisarnarsimassooq – kisianni qanorpiaq iluseqarsimanera ilisimanngilarput – soorlu pujup, killunit pisup, aniaffissaanik arlaatigut ammaneqarsimassooq. Killuni ikumatitsivik kiassaataasimavoq, qaammaqqutaallunilu iggaviusimassalluni.
Itsarnisarsiuut misissuinissat pissanganarpoq – tassami ujaqqanik sakkuliornermit sinnikunik arlaannilluunniit uumassuseqarsimasumit nassaartoqarpat aatsaat qularnaatsumik pisoqaassusaa, ujaqqallu ukiut 2.500 missaasa matuma siorntigut tupeqarfissatut iliorarneqarsimanersut aalajangerneqarsinnaammat. Tamanna qulakkeerutsigu – immikkoortortaq una nutartertariaqassuarput Tunillu kulturianni inigineqartarsimasut pillugit ilisimasagut annertunerusumik allaaserisinnaalissallugit.