Narsaamaneq tamanna inunnut itsarsuarnitsanut Thulekulturillu inuinut piffissani assigiinngitsuni ukiut tusindilikaat arlallit ingerlanerini nunassaqqissuusimavoq. Aasarissinerani ivikkat naalluarsimatillugit illukut takujuminaassisarput, kisianni nalunngilarput Sermermiuni illukut nutaajunerpaat ukioq 1850-iminngaannersuusut, ukioq taanna tamaani najugaqartut Ilulissat illoqarfianut nuunnissartik toqqarsimammassuk. Taamani inuit sisamanik saneralinnik mikisunik issunik ujaqqanillu qarmakkanik illoqartarsimapput. Illut qullernik ukkusissanik sanaanik kiassaateqartarsimapput orsumik immap uumasuinit miluumasunik pisunik ikummatilinnik. Qulleq kiassatitut atugaanermi saniatigut aamma qaammaqqutaasimavoq iggaviullunilu.
Illut 10-12 kvadratmeteritut angissuseqarsimapput, kisianni iigai issunik ujaqqanillu qammakkat issusuujummata iluata tungaa minnerusarpoq. Illup iuani pequtaasarput illeq iikkamut tunorlermut taleqqasoq siniffigineqartartoq, qullermut ilitsitivik illullu iluani suliassanut atortut pisariaqartitat allat amerlanngitsut. Illumi ilaqutariit najugaqarput: angajoqqaat meeqqallu ilaatigullu aanaa aataakkullu najugaqatigineqartarlutik. Illut tamarmik minnerpaamik ataatsimik piniartoqartarput, nerisassanik, amernik orsunillu pisarsiortussamik. Arnat aamma illumi pingaaruteqarluinnarput nerisassiorneq, qullerup ikumatinnissaa, ilaqutariit atisaasa amiusut sananissaat iluarsartuunnissaanillu akisussaaffigisaramikkit.
Illut ukiunerani taamaallaat najorneqartarput. Upernaakkut inuit tupermiulersarput, piniariartarfinnullu assigiinngitsunut angalasarlutik soorlu qilalugaqarfinnut, ataarniartarfinnut appaqarfinnut, ammassisarfinnut il.il. Aasaraangat kangerlunnut pulasarput nunallu timaanut tiffartertarput eqalunnik tuttunillu eqqanaarsarniarlutik. Ukiarluaraangat Sermermiunut uteqqittarsimaput ukiuunerani inuunerisartagartik ingerlateqqilerniarlugu.
Atagu pisuffissiakkut ingerlaqqilaarniarta. Uneqqikkutta illorujussuaq ilaqutariinnik arlaninnik najorneqartarsimasoq oqaluttuarissavara. Taakku illut sisamanik sanerallit aatsaannguaq nassuiaatigisama atulinnginnerini atugaasimapput.