Sermermiuni uumasut siumugassat ukiup ingerlanerani nikerartarput. Uumasut ilai inuunertik nallugu tamanittuusarput uumasulli allat aasaannerani taamaallaat tamaani tikisimaartarput.
Uumasunit miluumasunit mikinernit tamaaniittartut tassaapput ukaleq terianniarlu. Iluatsitsiguit ukaleq qaallorissuusoq tamaani ukioq kaajallallugu qaqqaniittartoq takusinnaavatit. Terianniaq tamaani qooqqumi uumasuuvoq, kisianni ullaarorluni angalaartarpoq ulluuneranilu sisimineerusaartarluni. Miluumasut anginerusut soorlu tuttut umimmiaallu tamaaniittanngillat kangerluup kujataata tungaani uumasuugamik.
Tamaani qooqqumi timmiarpaalussuaqartoq maugisimajunnarsivarsi: tulukkat, uppiit aqissillu tamaani kisimik ukiisartuupput, silaannaallu kissakkiartornera ilutigalugu timmissat mikinerit tamaani ukiisartut takusalernikuupput.
Canadap nerleri – maajimi tikerertarput qooqqup ivigaqarnersani uninngaariartorlutik. Upernaakkut ungasissorsuarmit angalasimanermik kingorna tamaani nerisassarsiortarput aasavitsinnagu nunap timaani tatsini piaqqioriartinnatik.
Iluatsitsiguit Ilulissat eqqaani tasialunni naluumasortuarannguaq siumorsinnaavat. Timmissani ilaqutariiaani taakkunani arnaviaq qalipaatigissunik meqqoqalersarpoq nuleerinerlu siuttuufigisarlugu. Mannilioreeraangat angutivissap maniit ivasarpai tukereeraangatalu piaqqat isumagisarlugit.
Timmissat tigutsisillit nattorallit, uppiit, kiinaaleeqqat kissaviarsuillu tamaani aamma takuneqarsinnaasarput.
Immap killiganit immap miluumasuinik angisuunik takunneriataarsinaavutit, kisianni piffissaq sumiiffillu eqqortoq nalerortariaqassuatit. Natseq ukioq kajallallugu kangerlummiittarpoq, aataarli New Foundland-ip sineriaani piaqqioreernermi kingorna aasakkut taamaallaat tamaaniittarpoq – taamaattumik puisip niaquanik takusaqaruit taakkua arlarisinnaavaat. Imaassinnaavoq aamma iluatsitsillutit arfermik takusaqartutit. Qipoqqaqatigiit aasaanerani isittup imaani inuussutissaqarluartumi neriartorlutik ungasissumiit tikiuttarput. Qipoqqaq taleqqumigut takisuutigut ilisariuminartuuvoq – Qipoqqaq nalinginnaasumik anersaariartorniarluni aqqartinnani sisamat tallimariarluniluunniit puisarpoq. Aqqarnermini paperuni aalatittarpaa.
