Maannakkut ingerlaarpugut qaqqami atorneqarsimarpasinngitsumi. Uani aqqutaani takuneqarsinnaapput, ujarappassuit majuussorneqarsimasut kingornagullu aalajangersimasumik inissitsiterneqarsimallutik. Tassa Inuit iliveqarfigisimasaat kristumiuussuseq ukiut 1700-kkut ingerlaneranni eqqunneqanngikkallarmat. Piffimmi ilerrit 140-t nalunaarsorneqarsimapput aammalu iliveq ataaseq arlalinnik timitaqarsinnaalluni. Nalinginnaasuuvoq maani qaqqami inoqarfiusimasup qulaani ilivernik naammattuuisinnaaneq – aammalu naliginnaasuuvoq ilerrit taama kusanartigisumiittarnerat, maani takusinnaasatsitut. Toqusimasut ataqqiniarlugit qasuersaarfissaannut pitsaanerpaamut ilineqarsimapput.
Kuisimanngitsuunerup nalaani naatsorsuutigineqartarpoq, inuk ataaseq pingasoqiusaasoq: Timi, anersaaq aterlu. Toqugaanni anersaaq silarsuarmi qiIammi immamiluunniit ingerlaqqikkumaartoq – piffiit tamarmik ajunngitsuupput upperisanullu allanut allat takorluugaat qilak anniarfillu akulerunneqassanngillat.
Toqusimasup timaa ilineqassooq asiullunilu. Ateq inoorlaamut atsiunneqassaaq taamaalilluni ateq ernioqqinnermut ilanngutissalluni. Ileqqoq meeqqamut atsiussisarneq kalaallit nunaanni suli atuuppoq, tamanilli atorneqarani. Tamanna ileqqut ilagiinnarpaat inuiaqatigiit kalaallit ataatsimoornerinut qanittunngortitsisartoq.
Kristumiuussutsip eqqunneqarnerani 17 aamma 18 unnorujukkunni illerfilerlugit ilisisoqartalerpoq. Ilaatigut aamma nassaarisinnaasarpagut ilerrit illerfillit 1600-kunnersut. Imaassinnaavoq arfanniat niivertullu, europa-miik takkuttut iliverigaat.
Ullumikkut kristumiut iliveqarfiit arlallit takusinnaavatit Ilulissani avataanilu – nutaanerit mittarfiup tungaanut aqqutip eqqaaniipput.
Maani ilerrit tamarmik eqqissititaapput kalaallit nunaanni eqqissisimatitsinermut inatsit malillugu. Taamaattumik minnerpaamik miiterit marluk ilerrit ungasitsigissavatit ujaqqallu illuanngisaannakkit imaluunniit qulagiuaallugit alakkarterniarsarinagit. Siulitsinnut ataqqinninnerit takutiguk.
Kangiata illorsuanut uterluta aallarpugut. Tungujortumik ilisarnaasikkat malinnaaffigikkit. Uniffissarput kingulleq tassaavoq Seqinniarfik imaluunniit Holms Bakke, ukiut tamaasa innuttaasut ulloq 13. januar katersuuttarfiat. Tulliani unikkutta tamanna pillugu paasisaqarluarit pulaarti immikkuullarissoq ullormi tassani takkuttartoq.