Saqqummersitsivik 2

Uani saqqummersitsivimmi 2-mi sermeq aseqqorissoq akimullu ersittoq pissarsiarisimavarput.

Sermimineq taamatut isikkulik nassaaringaangatsigu periarfissat marluusinnaasarput:

Ilimanarnerpaavoq sermimineq sermersuarmi sermilluunnit ningimarngani aput sermerlu iminngorsimasoq sikunngorluni qerisimasoq. Tassa pissuseq taamatut ingerlajuartuuvoq. Aasaanerani aput sermerlu iminngortoq annertoorujussuusarpoq issileraangallu kuussuit serminngorlutik qerisarput. Sermimineq taamak ittoq pisoqaassusaa aalajangersinnaanngilarput.

Maannakkulli sermimerngup akimut ersittup saavaniikkatta sermeq pisoqarujussuaq immikkut ittoq eqqartunngitsorsinnaanngilara, taannalu sermersuup naqqani itisoorujussuarmi siumorneqarsinnaavoq -  sermeq taamak isikkulik maannakkut sammisatsinnut assinguvoq:

Saqqummersitsivimmi 1-mi nassuiarpara, sermersuarmi apigaangat sermip pinngortarnera – ukioq ataaseq sinnerlugu pisoqaassuseqarluni serminngoriartortarnera – kiisalu 80 meterit missiliorlugit ititigisumi aputip pullartanilluni serminngortarnera. Tamaatuma kingorna naqitsineq annertusiartuinnartarpoq qaleriiaallu ataasiakkaat saattuararsuanngorlutik naqittarneqartarlutik.

1500 meterit missiliorlugit itissusilimmi naqitsinermit sermip sananeqaataa allanngoqqittarpoq.  Arfinilinnik teqeqqulimmit arfinilinnik saneralinngorluni kipparissunngortarluni, taamaalillunilu silaannaap molekylii sermip kusugaasaanut akuliussinnaanngortarput – pullartaaruttarpoq sermillu qalipaataa allanngortarluni.  Siusinnerusukkut pullartat seqerngup qinngorneri tamaasa akisuatittarpai – maannakkulli pullartat peerussimammata sermillu kusugaasaata ilusaat allanngorsimammat qaamanerup qalipaataasa tungujortortaa akisuatinneqartarpoq taamaattumillu sermeq tungujutortumik kusanartumik qalipaatilittut isikkulik takusinnaavarput.

Sermeq taama ittumik pissusilik eqqartoriitsiagara ukiut 12.000-it 120.000-llu akornannik pisoqaassuseqarsinnaavoq. Kisianni ilimanarpallanngilaq sermeq taamak ittoq maaniittup assigigaa – tassunga pissutaavoq sermeq taamatut pissusilik qaqutigorujussuaq sermip ningimarngatigut aniasarnera.