Saqqummersitsivik 1

Qeqertarsuup Tunua qiviapallariarutsigu ilulissat amerlanersai aputitut qaqqorissuusut takusinnaavarput. Taamaattumik uani iluliap qaqqorissup aseqqua qaqissimavarput. Qanimullu isiginnaarukku iluliap qaava qanoq isikkoqarsimassasinnaasoq takusinnaavat.

Sikuminerup qaqqorissuuneranut pissutaaasut ilagaat sikumi sikullu pullartarpassuani qaamanerup sangusarnera – fysikkimilu ilisimavarput qaaq qaqortumik qalipaatilik tassaasoq seqerngup qinngornerisa akisuatinneqarnerat sermimillu utertertinneqarnerat.

Sermeq ukiorpassuit ingerlaneranni apisarneranik sermersuarmi pinngorsimavoq. Apisarnera ima ingasatsigisarsimavoq allaat sermeq sumiiffiit ilaanni 3,2 km-nik issussuseqalersimalluni. Qularurisassaanngilaq aput taamak issutigisoq oqimaatsorujussuummat, taamaattumillu sermip naqqani naqitsineq annertooq pinngortittarpaa – aputillu kusugaasai katitertarpai mangertunngorlugu naggataatigullu serminngortittarlugu. Aput 80 meterit missiliorlugit itissusilimmi serminngortarnera taamallu ititigisumi silaannaq pullartanngorluni sermimi mattussaasarpoq. Sermeq misissoraanni eqqaamasariaqarpoq silaannaq aatsaat sermimi 80 meterinik itissusilimmi mattussaasimanera, taamallu itigisumi aput ukiunik 100-nik pisoqaassuseqalereersimasinnaavoq.

Sermip pisoqaassusaa paasiniarusukkukku misissueqqissaartarfimmut allamukartariaqassaatit. Misissueqqissaartarfimmi sermip seernassusaa pissusaalu allat tunngavigalugit pisoqaassusaaa aalajangerneqarsinnaavoq.

Misissueriaaseq pingaartoq alla atorlugu sermip silaannarmik akoqassusaa misissorneqarsinnaasarpoq, taannalu tunngavigalugu taamanikkut silaannaq sermimi mattunneqarmat silap qanoq issimaneranik tikkuussisinnaavoq. Toqqaannartumik silaannaap kissassusaa uuttorneqarsinnaanngilaq, kisiannili silaannaap iltimik akoqassusaata uuttortarneratigut nuissap aputit pinngorfiata kissassusaa paasineqarsinnaasarpoq.

Naliginnaasumik sermeq qaqortoq sermersuaqarnerata kingulliup kingorna pingorsimasoq naatsorsuutigisinnaavarput – taamaattumillu ukiut 12.000-it tikillugu pisoqaassuseqarpoq.